Монголын шинжлэх ухааны байгууллагууд болон их дээд сургуулийн эрдэмтэн судлаачид, багш нарын хамтын хөдөлмөрийн үр дүнд бүтээсэн "Хүннүгийн толь бичиг” хэмээх тус бүтээлд Хүннүгийн түүхийн үндсэн сурвалж бичгүүд, түүний дотор хятад хэл дээрх түүхийн сурвалжууд болон археологийн сурвалжуудын талаар товч тодорхой оруулсан байна. Мөн дээрх сурвалжуудад үндэслэн Хүннүгийн түүхийн голлох үйл явдлууд, тэдний түүхэн газар нутаг, түүхэн зүтгэлтнүүдийг тодруулан үзүүлжээ. Мөн Хүннүгийн бие даасан өвөрмөц урлагийг илэрхийлэх гол гол археологийн дурсгал олдворуудын тайлбарыг гэрэл зургийн хамт оруулсан байна. Түүнчлэн Хүннүгийн соёл, шашин, зан үйл, аж ахуй, эдийн засгийн үндсэн асуудлуудыг нэлээд дэлгэрэнгүй байдлаар өгүүлсэн нь сурталчилгаа танин мэдэхүйн төдийгүй судалгаа шинжилгээний ач холбогдолтой болжээ. Энэ бүтээл бол Хүннү хэмээх их соёл иргэншлийн талаар дэлхийд гарч буй анхны толь бичиг болох төдийгүй Монголын түүхийн нэгэн мянганыг Хүннүгээр гол болгон авч үзсэн анхны толь бичиг болсон байна. Хүннүгийн толь бичиг нь ШУА-ийн Археологийн хүрээлэнгээс түүхт ойг тэмдэглэн өнгөрүүлэх ажлын хүрээнд гаргасан гуравдахь томоохон хэмжээний бүтээл болно. Үүний урьд "Хүннүгийн археологи, түүхийн судалгааны зарим асуудал” эрдэм шинжилгээний шилмэл өгүүллийн эмхэтгэл, "Хүннүгийн өв соёл” каталогийг монгол, англи хэлээр хэвлэн гаргаад байна. Энэхүү гурвал бүтээл нь Хүннүгийн судлалын төв тэдний уугуул нутаг Монгол оронд эрчимтэй хөгжиж байгааг илтгэн харуулж байна.